صالح جمعة: «محدش في الأهلي ليه عين يطلب تعديل عقده.. وحدوتة إمام عاشور بقت مملة»

أكد صالح جمعة لاعب النادي الأهلي السابق، أن لاعبي المارد الأحمر ليس لديهم الحق في المطالبة بتعديل عقودهم، خاصة بعد الأداء والمستوى الذي ظهروا به خلال الموسم الجاري.

صالح جمعة: محدش في الأهلي ليه عين يطلب جنيه

وقال صالح جمعة في تصريحات تليفزيونية: «جزئية إمام عاشور بقت مملة شوية من وجهة نظري، لسه فاضلة سنتين، هو أفضل لاعب في مصر كإمكانات، ولكن محتاج يقدم أكتر من كده للأهلي، ويشوف حسين الشحات ولاعيبة ضحت بفلوس، ومكنوش بيتكلموا».

وأضاف: «الراجل بينزل بيكون مؤثر وليه دور، بس بعد الموسم ده والأداء ده، مينفعش لاعب يتكلم ويقول أنا عايز جنيه، لكن من ناحية تانية أنا عندي كأس العالم وممكن أكون إضافة».

صالح جمعة: إمام عاشور زي عبدالله.. واتكلمت علشان بحبه

وتابع: «القرار عند إدارة النادي مش اللاعب، أنت ماضي معايا 5 سنين، ولسه فاضلك فيهم اتنين، حتى لو جبتلي عرض، أنا ممكن أكون مش محتاج فلوس، بس محتاجك فنيا، وبالفعل الأهلي مش محتاج فلوس».

واختتم: «إمام عاشور أخويا وأنا بحبه، ولما طلعت اتكلمت، كان علشان أنا بحبه وهو زي عبدالله جمعة، أنا كنت في نفس مكانه وعندي إمكانات، وكان ممكن أوصل لمكان أعلى، حاله حال كهربا، وأنا عايز أشوفهم كويسين».